(Muqdisho,Arbaco,23,Julaay,2008,(Hornafrik Media)

Guddoomiyaha isbahaysiga dib u xoreynta soomaaliya ee xilka ay ka qaadeen xubnaha isbahaysiga ee Asmara kusugan  sheikh shariif sheikh Axmed ayaa waxba kama jiraan ku tilmaamay xil ka qaadistay la sheegay in lagu sameeyay.

Sheikh shariif waxa uu sheegay in xubnaha xilka ka qaaday ee kusugan Asmara aysan ka badneyn 30 xubnood islamarkaana aysan awood u lahayn in xil ka qaadis ay ku sameeyaan.

Sheekhu waxa uu sheegay xubnaha isbahaysiga ay ka kooban yihiin 191 xubnood.

Waxa uu ku eedeeyay dowladda Ereteria inay kala qeybinayso Mucaaradka isagoo intaasi ku daray in maslaxada ah soomaaliya aysan dooneynin dowladaasi.

Sheekh Xasan Daahir Aweys oo loo doortay guddoomiyaha golaha fulinta isbahaysiga dib u xoreynta dalka gaar ahaan garabka kusugan Asmara waxa uu sheegay inay ka xunyihiin kala qeybsanaanta ku timid isbahaysiga laakin waxa uu yiri “arrintaasi waxaa sabab u ah sheikh shariif sheikh Axmed”.

Sidoo kale Dr Shariif Saalax Maxamed Cali oo ka mid ahaan jiray baarlamanka xorta oo ku biiray isbaheysiga ayaa loo magacaabay gudoomiyaha golaha dhexe ee ururkaasi kala tagay.

Kala qeybsanaantaan xooga leh ee soo kala dhexgashay isbahaysiga dib u xoreynta ayaan la ogeyn halka ay ku danbeyn doonto waxana uu ku soo beegmaysaa xili ay sii xoogeysanayaan dagaalada u dhaxeeyay xoogaga kacdoonka iyo Ciidamada Itoobiya oo garabsiinaya dowladda KMG ah ee Soomaaliya.