Dagaal Sh/hoose ku dhexmaray ciidamada labada dowlo  iyo xoogaga mucaaradka.

(Mogadishu,Axad,20,July, 2008,(Hornafrik Media) Iska horimaad la isku adeegsaday hubka nuucyadiisa kala duwan ayaa goor dambe oo galabta ahayd ka dhacay wadada dheer ee isku xirta deegaamada Leego iyo Yaaqbariweyne oo dhamaantood hoostaga maamulka gobolkaasi Sh/hoose. 

Dagaalka ayaa qarxay ka dagaal markii xoogaga kacdoonka wada ay weerar jid gal ahaa ku qaadeen kolanyo ciidamo isku dhafan oo ahaa Itoobiyaan iyo kuwo cusub oo dhawaantani loo soo tababaray dowlada federaalka ah ee Somalia oo ku soo jeeday caasimada Somalia ee Muqdisho la weeraray. 

Ilaa iyo iminka lama oga rasmiyan khasaaraha soo kala gaaray dhinacyadii halkaasi ku dagaalamay, balse qaar ka mid ah dadka deegaanka ayaa idaacada HornAfrik u sheegay in ay jiraan khaasaarooyin aan koobneyn. 

Dhinacyada dagaalamay lama soo sheegin wax tafaasiil ah oo ay ka soo saareen dagaalka dhexmaray inta rasmiyan uu khasaarihiisu gaar siisan yahay balse afhayeenka Al-shabaab ayaa sheegay in dagaalkaasi oo ay qaadeen waxyeelo badan gaarsiiyeen dhinaca kale rag muhiim ahna ay kaga qabteen dagaalka.  

Mudooyinkii ugu dambeeyay waxaa soo kordhayay weeraro sii joogtoobaya oo ay qabatintay wadadaasi u dhaxeysa Leego iyo Yaaqbariweyne ee gobolkaasi. 

Wararka ugu dambeeya ee halkaasi aynu ka heleyno ayaa sheegaya in haatan xaalku degan yahay, inkasta oo weli taagan tahay cabsiyo laga qabo isku dhacyo kale oo horle in ay halkaasi ka dhacaan.