Ciidamo Itoobiyaan ah oo saaka isku fidiyay qeybo ka mid ah Muqdisho.

Mogadishu ,11, September 2007 (HornAfrik Media)

Ciidamo itoobiyaan ah oo fara badan ayaa saaka la soo dhoobay xaafadaha degmooyinka Hodan iyo H/wadaag ee Magaalada Muqdisho. halkaasi oo dhaqdhaqaaqii gaadiidka iyo dadka ay hakad galeen.

Waxaa saaka dadka degan xaafadaha degmooyinka Hodan iyo H/wadaag ee Magaalada Muqdishoi ay ku waabariisteen Ciidamo aad u fara badan oo itoobiyaan ah kuwaas oo hakad galiyay dhaqdhaqaaqii gaadiidka dadwayneha ee u kala gooshi jiray deegaanada kale duwan ee Magaalada.

Isgoyska Balaag sii ee degmada Hodan ayaa waxaa lagu arkayay Ciidamo itoobiyaanka oo jardiinooyinka fadhiya,iyadoo sidoo kale xaafadaha qaar kood kujireen.

Sidoo kale isgoyska Baar ubax ayaa isna waxaa soo buux dhaafiyay Ciidamada itoobiya oo aad u hubaysan kuwaas oo aan la garanayn sababta keentay in saaka ay isku fidiyaan deegaanadaasi.

Gaadiidka BL-K ah ee ka dhex shaqayn jiray degmada afgoooye ee gobolka sh/hoose iyo Magaalada Muqdisho ayaan saaka gabi ahaanba lagu arkin isgoysyada deegaanada Baar ubax iyo Black sea ee Magaalada Muqdisho.

Dhinaca kale waxaa qarax Bamgacmeed lagu qiyaasay laga maqlay inta u dhaxaysa isgoyska Baar ubax iyo Hotel Salaamo halkaas oo Ciidamada itoobiya ay kusuganyihiin hase yeeshee lama oga qasaaraha uu gaystay qaraxaasi iyo waliba rasaas ay fureen qaraxa kadib Ciidamada itoobiyaanka.

Ilaa iminka lama oga sababta Ciidamada Itoobiyaanka oo qur ah ay u soo dhoobteen saaka deegaanadaasi.