Mogadishu ,10, September 2007 (HornAfrik Media)

Ilaa 4 qof oo rayid ah ayaa ku geeriyootay inta la ogyahay tira kalena waa ay ku dhaawacmeen weeraro hoobiyaal ah oo habeenimadii xalay ay is dhaafsanayeen kooxo hubaysan oo bartilmaameedsanayay xarunta Madaxtooyada Villa-Somalia iyo garoonka istaadiyo Muqdisho halkaasi oo ay kusugan yihiin Ciidamada itoobiyaanka oo iyana weerarkaasi jawaab ka bixiyay.

Weeraradaan oo la isku adeegsaday nuucayda qorayaha waawayn ee hoobiyaasha ayaa waxaa ay bilowdeen saacaddu marka ay ahayd sadaxdii habeenimo iyo qadara daqiiqado ah kuwaas markii hore lala bartilmaameedsaday xarunta Madaxtooyada ee dowladda KMG ah ee soomaaliya.

Hoobiyaashaan ayaa waxaa sidoo kale kooxo hubaysan ay ku weerareen garoonka kubadda cagta ee istaadiya Muqdisho halkaasoo ay kusuganyihiin qaar ka mid ah ciidamada itoobiyaanka.

Waxaa la arkayay madaafiic fara badan oo jawaab celin ah kuwaas oo aan iyana loo meel dayin islamarkaana ku habsaday xaafado dad rayid ah ay ku nool yihiin oo ka ag dhawaa goobihii Madaafiicdu ka soo dhacaysay.

Deegaanka suuqii hore ee xoolaha ee degmada wardhiilay oo ka ag dhaw aqalka Madaxtooyada ayaa qasaarihii ugu badnaa uu soo gaaray dad rayid ah kadib markii madaafiic hoobiyaal ah oo isla socotay ay ku habsadeen sida ay Hornafrik u xaqiijisay haweenay ka mid ah dadka deegaankaasi.  

Hal qoys oo ka mid ah dadka deegaankaasi ayaa waxaa soo food saartya qasaarihii ugu waynaa kadib markii ay ka dhinteen sadax wiil oo walaala ah iyo hooyadii dhashay wiilashaasi,iyadoo sidoo kale uu dhaawac aad u culus soo gaaray aabihii qoyskaasi,

Si kastaba ha ahaateen dhawaan ayay ahayd Markii madaafiic hoobiyaal ah oo lagu tuuray degmada shibis iyo C/casiis oo xiligaasi uu ka soconayay shirkii dib u heshiisiinta beelaha Soomaaliyeed ay ku dhinteen dad rayid ah oo aan waxba galabsan.

Inta badan Ciidamada itoobiyaanka ee kusugan Magaalada Muqdisho ayaa marka ay dhacdo in hoobiyaal lagu soo weeraro waxaa ay iyana jawaab aysan u meel dayin u diraan goobaha ay qiyaasayaan in hubka looga soo riday taasoo inta badan dhibaato xoogani ay ka soo gaarto dad aan waxba galabsan.

goor dhaw Daawo Sawiradda dhibaatada ku dhacday qoyskaan.