Maamulka Gobolka Sh/Hoose oo jidgooyooyin ka qaaday degmooyinka Afgooye iyo Baraawe.

Mogadishu ,03, September 2007 (HornAfrik Media)

Saraakiisha iyo maamulka gobolka Sh.hoose ayaa sheegay in ay ku guulaysteen qaadista dhowr jidgooyooyin oo yiilay inta u dhaxaysa degmooyinka Afgooye iyo Baraawe kuwaas oo lacago baad ah looga qaadan jiray gaadiidka wadadaasi isticmaala.

Gudoomiyaha Gobolka Sh.hoose iyo xubno kale oo katirsan Maamulka oo howlo shaqo ku jooga qeybo ka mid ah gobolkaasi ayaa sheegay in ay ku guulaysteen in ay qaadaan ilaa dhowr isbaaro oo dadka lagu wax yeelayn jiray kuwaas oo yiilay inta u dhaxaysa afgooye iyo Baraawe.

Waxaa sidoo kale ay sheegeen in ay xaliyeen khilaafyo u dhaxeeyay qaar ka mid ah  dadka ku nool degmooyinka Gobolka sh/hoose.

Xubnahaan katirsan Maamulka Gobolka sh/hoose ayaa waxaa hogaaminaya C/qaadir sheikh Maxamed Nuur waxaana ay sheegeen inay gaari doonaan degmooyinka Walaweyn iyo Owdheeglle ee Gobolka sh/hoose arrintaas oo ay sheegeen in ay tahay sidii loo adkayn lahaa ammaanka guud ee gobolka.

Dhinaca kale Maamulka sh/hoose ayaa Ciidamo geeyay wadooyinka mara dhinaca xeebta gobolkaasi halkaasi oo ay ku soo bateen baryahaan kooxo burcad ah.

Gobolka Sh.hoose ayaa waxaa baryahaan ku soo badanayay jidgooyooyin fara badan oo ay lacago baad ah kaga qaadanayaan dadka iyo gaadiidka kooxo burcad ah iyagoo mararka qaarna jir dil iyo boob u gaysanaya rakaabka.