Iska hor'imaad hubeysan oo ka dhacay xaruntii Guulwadayaasha ee magaalada Muqdisho.

Mogadishu ,30, September 2007 (HornAfrik Media)Dagaal culus ayaa caawo goor hore ku dhexmaray dhismihii hore ee ciidamada G/wadayaasha askarta ciidamada booliska iyo kooxo hubeysan oo ka soo horjeeda siyaasada dowlada KMG ah ee Soomaaliya.  

Iska hor'imaadkaasi ayaa qarxay abaaro maqribnimadii hore ee caawo kaasi oo la isku adeegsaday hubka nuucyadiisa kala duwan wuxuuna soconayay muddo dhowr daqiiqada ah. 

Mid ka mida dadka deegaanka oo idaacada HornAfrik u warameeysay ayaa sheegtay in la arkayay madaafiic tuuro ahaa oo dulmarayay xaafadaha ku teedsan halka uu dagaalka ka dhacay ee Guulwadayaasha. 

Dhismihii hore ee ciidamada G/wadayaasha ayaa waqti xaadirkaani waxa uu fariisim u yahay cutubyo ka tirsan ciidamada booliska xukuumada federaalka ee Soomaaliya.   

Ilaa iyo iminkana lama garanayo qasaaraha rasmiyan uu geystay dagaalkaasi caawo. 

Balse, waxaa la aaminsan yahay in uu qayb ka yahay weeraradda habeenadii ugu dambeeyay lagu qaadayay saldhigyada ciidamada dowlada Soomaaliya.