4 ruux oo ku geeriyootay iska horimaady labo maleeshiyo beeleed ku dhexmaray deegaanka katirsan Gobolka Sh/hoose.

Mogadishu ,30, September 2007 (HornAfrik Media)

4 qof ayaa ku geeriyootay tiro kale oo dad ahna waa ay ku dhaawacmeen inta la ogyahay kadib markii maanta iska horimaad labo maleeshiyo beeleed uu ku dhexmaray deegaanka Kuunyabarrow oo katirsan Gobolka Sh/hoose.

4 ruux ayaa ku geeriyootay tiro intaasi la egna waa ay ku dhaawacmeen ka gadaal markii maanta labo maleeshiyo beeleed oo ka soo jeeda deegaanka Kuunyobarrow oo qiyaastii 90KLM dhinaca koofureed uga beegan xarunta degmada Barawaaye uu dagaal maanta halkaasi ku dhexmaray.

Arrinta iska horimaadkaan ayaa waxaa la sheegay in uu la xariiro iska qab qabsi ka yimid dhinaca dhuxusha,iyadoo taasina ay saameyn balaaran ku yeelatay isku socodka gaadiidka isaga kala goosha gobolka J/dhexe iyo Sh/hoose.

Dadka ku dhaqan deegaanadaasi ayaa HornAfrik u xaqiijiyay in gaadiid fara badan oo u kala gooshayay deegaanada Jilib iyo baraawe ay halkaasi ku xayiranyihiin hase ahaatee Maamulka degmada Baraawe ayaa sheegay in ay iminka ku howlanyihiin sidii arrintaasi looga hortagi lahaa.

Si kasta oo ay ahaataba iska horimaadkaan ka dhacay deegaanka Kuunyabarrow ayaa waxaa uu sababay in dadkii deegaankaasi ay ka huleelaan iyagoo ka baqdin qaba dhibaato soo gaarta.

Ma ahan markii ugu horaysay oo deegaanadaasi ay ku herdamaan maleeshiyo beeleedyo balse waxaa jiray horaantii bishii la soo dhaafay isku dhacyo sababay dhimasho iyo dhaawac kaasoo sidoo kale la xariiray jarista dhirta.

Xuseen Nuur Geesay"Sh/hoose.