Guddiga ganacsatada Gobolka Banaadir ayaa maanta deeq lacageed gaarsiiyay Bukaanada kujira qaar ka mid ah isbitaalada waawayn ee Magaalada Muqdisho taasoo ay ugu tala galeen bisha barakaysan ee Ramadaan.

Deeqdaan lacageed oo ay iska soo arruuriyeen xubnaha midowga ganacsatada Gobolka Banadir ayaa waxaa isla maantaba la gaarsiiyay isbitaalada waawayn ee Magaalada Muqdisho,iyadoo bukaan walba gacanta loo galay qoodadii lacageed ee loogu talagalay.

Isbitaalada maanta la gaarsiiyay deeqdaan lacageed ayaa waxaa ka mid ah isbitaalka Banaadir iyo Madiina.

Dr Xasan Cismaan Ciise Buurane oo ah Maamulaha isbitaalka Madiina ee Magaalada Muqdisho ayaa aad uga mahadceliyay deeqda maata la gaarsiiyay bukaanada ku jira isbitaalkaasi.

Afhayeenka taakulaynta Midowga ganacsatada oo isagu halkaasi ka hadlay ayaa sheegay in ay sii wadi doonaan kaalmooyinka ay ka wadaan Magaalada Muqdisho.

Xubnaha ganacsatada Gobolka Banaadir waxaa ay ugu baaqeen jaaliyadaha iyo shirkadaha ganacsatada Gobolka Banaadir in ay kaalmeeyaan shacabka dhibaataysan.