Ciidamada dowladda KMG ah oo maanta ka guuray wadada 2-aad ee suuqa Bakaaraha.

Mogadishu ,1 October 2007 (HornAfrik Media)

Ciidamada dowladda KMG ah ee Soomaaliya ee fariisinka ku lahaa wadada Aadan Cade ee suuq Bakaaraha Magaalada Muqdisho ayaa maanta halkaasi ka guuray iyadoo dadka deegaankaasi ay si aad u soo dhaweeyeen.

Ilaa iyo dhowr iyo toban barri oo Ciidamo katirsan dowladda KMG ah ee Soomaaliya ay Saldhig ka dhigteen wadada alaabad ee suuqa Bakaaraha ee Magaalada Muqdisho ayaa waxaa saaka gabi ahaanba Ciidamadaasi ay ka huleeleen fariisinkii ay halkaasi ku lahaayeen.

Dadka deegaanka ayaa waxaa ay sheegeen in si aad ay ugu faraxsanyihiin Ciidamada dowladda ee ka guuray wadada labaad ee suuqa Bakaaraha iyagoo sheegay in dhaqdhaqaaqii ganacsiga iyo dadweynaha uu caadi goobahaasu ugu soo laabtay.

Xirnaanshaha wadada labaad ee suuqa Bakaaraha ayaa waxaa ay saameyn xoogan ku yeelatay howlihii ganacsiga ee halkaasi ku yiilay muddo ka badan todobaad.

lama oga sababta rasmiga ah ee ka dambaysay in Ciidamada dowladda ay faarujiyaan fariisinka ay markii hore ka samaysteen wadadaasi.

Dhinaca waxaa macquul ah in Idaacadda Shabelle oo ku taala wadada labaad ee suuqa Bakaaraha ay dib hawada ugu soo laabato maadaam Ciidamadii dul daganaa ee rasaaseeyay ay ka guureen goobihii ay daganaayeen.

Afhayeenka Booliska dowladda KMG ah ee Soomaaliya u qaabilsan xariirka saxaafadda iyo dadweynaha C/waaxid ayaa sheegay in Ciidamaasi markii ay u baahdaan ay dib ugu soo laaban doonaan fariisinka ay ka guureen taasoo hadii ay dhacdo mar kale u horseedi karta dadka deegaanka saameyn marlabaad soo food saarta dhaqdhaqaaqooda iyo ganacsigooda.