Hal qof oo ku dhintay tacshiirad ay fureen ciidamada dowladda kMg ah ee Somalia.

(Mogadishu, December 15, 2007 HornAfrik Media)

Hal qof oo rayid ah ayaa ku geeriyoday inta la ogyahay mid kalena dhaawac ayaa soo gaaray kadib tacshiirad ay fureen Ciidamo katirsan dowladda KMg ah ee Somalia kuwaas oo kusugan isgoyska howlwadaag ee Magaalada Muqdisho wax yar kadib markii ciidamadaasi qarax lala beegsaday.

Shaqaaqadaan ayaa dhacday abaare 7:30 ee saaka kadib markii la maqlay dhawaqa qarax xoogan oo lala beegsaday ciidamo katirsan dowladda KMg ah oo kusugan isgoyska howlwadaag.

Lama oga qasaaraha ciidamada ka soo gaaray qaraxaani,iyadoo xariir lala sameeyay saraakiisha ciidamada booliska ayaan suura galin.

Inta la ogyahay hal ruux oo rayid ah ayaa ku dhintay rasaasta ay fureen ciidamada dowladda KMg ah waxaana ku dhaawacmey qof rayid ah oo kale sida qof goobjooge ah uu Idaacada iyo TV-ga HornAfrik u xaqiijiyay.

Ma ahan markii ugu horeysay oo ciidamada dowladda KMg ah iyo kuwa itoobiyaanka  ee kusugan Magaalada Muqdisho ay dilaan dad rayid ah oo aan waxba galabsan.