Kooxo hubeysan oo dil iyo dhaawacba u geystay mas'uuliyiin ka tirsan maamulka gobolkani Banaadir iyo golaha barlamanka Somalia.

(Mogadishu, January 31 , 2008 Hornafrik Media) War goor dhaweyd inaga soo gaaray degmadaasi X/weyne ee magaaladatani Muqdisho ayaa sheegaya in ku simaha afhayeenka maamulka gobolka Banaadir Cabaas Maxamed Nuur oo loo yaqaano "Cabaas Galeyr" ay kooxo hubeysan dhowr xabadood ay kula dhufteen gudaha degmadaasi gaar ahaan agagaarka halka Cadayga lagu magacaabo taasi oo keentay in rasaastaasi uu u geeriyoodo. 

Wararka qaarkood waxa ay lee yihiin kooxaha geystay weerarkaasi ayaa ku hubeysnaa hub gacmeedka loo yaqaano Bastooladaha. 

Ilaa iyo iminkana lama oga rasmiyan sababaha dhaliyay weerarkaasi lagu qaarajiyay mas'uulkaasi ka tirsanaa saraakiisha maamusha gobolkani Banaadir.  

Sidoo kalana kooxo hubeysnaa ayaa weerar gaadmo ahaa ku qaaday xildhibaan Bootaan Ciise Caalin oo ka mida mudanayaash golaha barlamaanka xukuumada ku meel gaarkaa ee Somalia xili uu ku sugnaa meel yara baxsaneyd afaafka hore guriga uu ka degan yahay magaaladatani Muqdisho. 

Weerarkaasi ayaa la sheegay in xildhibaanka uu dhaawac ka soo gaaray caawo. 

Waxaana dhaawiciisa lagula degdegay isbitaalkaasi weyn ee Madiina halkaasi oo la soo sheegayo in lagu dabiibayo. 

Warar iminka soo baxayna waxa ay sheegayaan in haatan Bootaan Ciise uu ku jiro qaybta qaliinka ee isbitaalkaasi Madiina. 

Falalkaasi ayaa soo baxaya xili caawo qaybo ka mida xaafadaha degmooyinka caasimada Somalia ee Muqdisho laga maqlayo dhawaqa rasaasta iyo madaac aad u xoogan oo qalqal galiyay rayidka reer Muqdisho.