Taliyaha Ciidamada DF ee isagu hogaaminaya Ciidamada dhawaan lagu soo tababaray wadanka Itoobiya ayaa si kulul ugu eedeeyay saraakiisha ammaanka gobolka shabeelaha Hoose in iyagu ay la shaqeeyaan xoogaga ka soo horjeeda Dowladda KMG ah.

Horjooga Ciidamada dhawaan lagu soo tababaray dalka Itoobiya  waxa uu sheegay in saraakiisha Ciidamada Booliska dowladda KMG ah ee soomaaliya ay la shaqeeyaan xoogaga ka soo horjeeda dowladda iyadoo uu xusay in aan lagu tilmaami Karin rag ka tirsan dowladda KMG ah ee soomaaliya sida uu hadalka u dhigay.

“Waan ognahay 200 oo askari ayaa lagu dilay gobolka shabeelaha hoose waxana dilay raga uu hogaaminayo Cali ganey oo ah taliyaha Ciidamada Booliska ee gobolka shabeelaha Hoose sidaas waxa yiri Gashaanle Daahir Maxamed Cabdi oo ah sargaalka hogaaminaya Ciidamada Dowladda ee dhawaan lagu soo tababaray wadanka Itoobiya.

Ciidamadan markii ay shalay soo gaareen degmada Afgooye ee gobolka shabeelaha Hoose waxa ay ku dileen gudaha Magaaladaasi labo nin oo ka tirsan Ciidamada maamulka gobolkaaasi oo iyana dowladda ka tirsanaa labana oga sababta ay u dileen ee dhabta ah.

Dhinaca kale Taliyaha Ciidamada Booliska gobolka shabeelaha Hoose Cali Aadan Cali Ganey ayaa ku eedeeyay Ciidamadan lagu soo tababaray dalka Itoobiya inay yihiin kuwa qabiil kuwaas oo lala soo dardaarmay,balse aysan ahayn kuwa ka tirsan dowladda KMG ah ee soomaaliya wuxuuna intaasi ku daray in Ciidamaasi ay u soo shaqa tageen inay dhacaan hantida shacabka ee gobolka shabeelaha Hoose sida uu hadalka u dhigay.

Si kastaba ha ahaatee Ciidamadan lagu soo tababaray dalka Itoobiya oo aad u hubeysan ayaa soo gaaray Magaalada Muqdisho saacado ka hor maanta.