Dagaalo khasaare geystay oo ka dhacay magaalada Muqdisho

(Mogadishu,Axad,20,July, 2008,(Hornafrik Media) Inta la ogyahay in ka badan 7 qofood oo rayid ahaa ayaa ku geeriyootay tiro kalana dhaawacyo ayaa ka soo gaaray iska horimaad xoogan oo ka dhacay wadada Warshadaha ee magaaladatani Muqdisho intii lagu guda jiray saacadihii dambe ee galabta.

Dagaalka ayaa xoogiisu biloowday ka  dib markii xoogaga Maxaakiimta ay weerar kadis ah ku soo qaadeen fariisimo ciidamada Itoobiya ay ku lee yihiin aagaasi. 

Weerarkaasi ka gadaal ayaa ciidamada militaarka Itoobiya ee saldhiga ciidan ku leh dhismihii hore ee garoonka kubada cagta Muqdisho waxa ay duqeyn ba’an oo ay u adeegsadeen madaafiicda culculus ku garaaceen xaafado dad rayid ah ay ku dhaqan yihiin oo ku yaala degmooyinka Yaaqshiid iyo Deyniile ee gobolkani Banaadir, guryo ku yaala deegaanka Gubta ayaa laga soo sheegayaa in ku dhawaad shan qofood oo u badnaa haween iyo caruur ku nafwaayeen duqeytaasi. 

Waxaana jira warar kale oo sheegaya in khasaaruhu uu intaasi ka badan yahay bacdamaa ay madaafiicdu ku dhacayeen goobo kale oo dhowr ah. 

Ciidamada Itoobiya ayaa ku caan baxay beegsashada goobaha ay ku tuhmayaan in ay nagi ku yihiin qoysaska fara ku tiriskaa ee aan weli ku sulkicin qulqulatooyinka ka soconaya caasimada Somalia ee Muqdisho, balse mas’uuliyada weerarkaasi waxaa sheegtay in ay Itoobiyaanka ku qaadeen Maxkamadaha Islaamka sida uu HornAfrik u sheegay afhayeenka howl-galada Sheekh C/raxiim Ciise Caddow oo idaacada la soo xariiray. 

Wixii war ah oo ku soo kordha kala soco wararkayaga dambe.