HornAfrik

Safiirka dowladda Mareykanka u fadhiya Nairobi oo cambaareeyey dilkii mas'uliyiin ka tirsan HornAfrik.

Safiirka dowladda Mareykanka u fadhiya magaalada Nairobi ee dalka Kenya Michel Rainburger oo maanta shir jaraa'id ku qabtay magaaladaas Nairobi ayaa si weyn u cambaareeyey dadkii ka dambeeyey falkii lagu dilay Agaasimihii HornAfrik Cali Iimaan Sharma'arke iyo weriye Mahad Axmed Cilmi.

Safiirka ayaa sheegay in marxuumiintaas ay ahaayeen kuwa dadkooda jeclaa bulshada Soomaaliyeedna si hagar la'aaneed ugu wada adeegi jiray.

Safiirka dowladda Mareykanka u fadhiya dalka Kenya Machel Ranbergar ayaa ugu baaqay Idaacadaha HornAfrik iyo Capital Voice iyo guud ahaan Idaacadaha ka howlgala dalka Soomaaliyeed inay howlahooda sii laba laabaan.

Safiirka ayaa sidoo kale wariyaasha ka howlgalaya Idaacadahaas ugu baaqay dhabar adeyg iyo karti dheeraad ah inay muujiyaan maadaama ay ka shaqeenayaan dalka Somaaliya gaar ahaan caasimada Muqdisho oo ammaankeeda uu yahay mid aan la isku haleyn karin.

Dhinaca kale, warbaahinta dalka Kenya ayaa si weyn maalmahan uga hadleysay taarikhda labadaas marxuum iyadoo warbaahinta ay ku tilmaantay maalintaas la dilay maalin madow oo u soo hoyatay dadka Soomaaliyeed islamarkaana aaney ilaawi doonin Soomaalida.

Sidoo kale, dadwaynaha Soomaaliyeed eek u nool dalka Kenya gaar ahaan magaalada Nairobi ayaa aad ugu xumaaday dilalkii loo geystay mas'uuliyiin ka tirsan HornAfrik iyagoo tacsi u diray dhammaan shacabka Soomaaliyeed bahda Warbaahinta iyo qoyskii ay ka geeriyoodeen.

Ururada bulshada gobolada Jubooyinka iyo Galgaduud oo maanta cambaareeyey dilkii loo geystay mas'uuliyiin ka tirsan HornAfrik.

Ururada bulshada rayidka ee ka howlgala gobolada Jubbooyinka iyo Galgaduud ayaa siyaabo kale gooni gooni ah maanta ay u cambaareeyeen dilkii loo geystay Agaasimihii HornAfrik Cali Iimaan iyo weriye Mahad Axmed Cilmi oo 11-kii bishan lagu dilay magaalada Muqdisho.

Qeybaha ururada bulshada rayidka ee magaalada Kismaayo ayaa maanta kulan ay isugu yimaadeen waxa ay ku cambaareeyeen ciddii ka dambeysay dilkii waxashnimada ahaa ee lagula kacay madaxda warbaahinta Idaacadaha iyo Telfishinka HornAfrik iyo Capital Voice ee magaalada Mqudisho.

Xubnihii kulankaas ka hadlay ayaa maanta qiray in sababta loo beegsaday aqoonyahankaas dowrka muga weyn ka ciyaarayey soo bandhigda dhibaatada heysta dadka aan codka laheyn eek u dhaqan magaalada Muqdisho ay aheyd si loo aamusiyo warbaahinta xorta ah iyadoo ujeedada gaarka ah ee HornAfrik loo beegsaday ay tahay sida ay sheegeen mid waxqabadka HornAfrik uu yahay mid muuqda.

Wakiiladii ururada bulshada rayidka ee kulankaas ka soo qeybgalay silamarkaana cambaareeyey arrintaas ayaa sheegay in munaasabadan ay tahay baroor diiq ay u dhigayaan mas'uuliyiinta HornAfrik.

Kulankaas oo ahaa mid warbaahinta lagu casuumay ayaa waxaa ka hadlay Agaasimaha HornAfrik ee magaalada Kismaayo Axmed Maxamed Aadan isagoo muujiyey dareenkiisa sida ay u saameysay dhacdadaas xanuunka badan ee soo wajahday HornAfrik waxa uuna ugu baaqay dowladda KMG ah ee Soomaaliya gaar ahaan Guddoomiyaha gobolka banaadir inay ka dhabeeyeen oo gacanta ku soo dhigaan ciddii ka dambeysay falkaas dilka ah ee lagula kacay mas'uuliyiintii HornAfrik.

Agaasimihii HornAfrik Cali Iimaan iyo madaxii Capital Voice Mahad Axmed Cilimi ayaa si weyn dilkooda looga dareemay guud ahaan gobolada Jubbooyinka waxaana muddo laba cisho ah hawada ka maqnaa Idaacadda sida rasmiga ah looga dhageysto magaalada Kismaayo ee HornAfrik Kismaayo.

Dhinaca kale, ururada bulshada rayidka iyo culumaa'udiinka qeyba ka mid ah gobolka Galgaduud ayaa cambaareeyey dilkii Mahad Axmed Climi iyo weliba Qaraxii lala beegsaday Agaasimihii guud ee HornAfrik Cali Iimaan Sharma'arke.

Dilalkii naxdinta lahaa ee sababay geeridii Agaasimihii HornAfrik Cali Iimaan iyo weriye Mahad Axmed Cilmi ayaa si dareen leh looga arkay gobolka Galgaduud iyadoo ururada bulshada gobolka, maamulada, ardayda, culumaa'udiinka dhalinyarada iyo dhammaan guud ahaan dadka gobolkaas ayey u aheyd maalmo murugo leh.

Dhamaan shacabka gobolkaas ayaa muujiyey sida ay uga xun yihiin xadgudbka iyo tacadiga arxan darada ah ee lagula kacay madaxda shirkadda Warbaahinta HornAfrik

Wasaarada arrimaha dibadda Mareykanka oo si kulul u cambaareysay falkii lagu dilay Cali Iimaan Sharma’arke iyo Mahad Axmed Cilmi.

Mogadishu,14, August 2007 (HornAfrik Media)

Wasaarada arrimaha dibadda dalka Mareykanka ayaa si kulul u cambaareysay falkaas naxdinta lahaa ee 11-kii bishan lagu dilay milkiilihii Idaacadda HornAfrik Cali Iimaan Sharma’arke iyo madaxii Capital Voice Mahad Axmed Cilmi.

Wasaarada arrimaha dibadda Mareykanka ayaa si xoog leh u cambaareeyeysa dilkii loo geystay Alle ha u naxariistee Agaasimihii Idaacadda iyo Telfishinka HornAfrik Cali Iimaan iyo madaxii Capital Voice Mahad Axmed Cilmi oo 11-kii bishan lagu dilay Muqdisho.

“Dowladda Mareykanka waxa ay si weyn uga xun tahay dilka labadaas marxuum” ayuu yiri Afhayeenka u hadlay wasaarada arrimaha dibadda Mareykanka isagoo saxaafadda kula hadlayey magaalada Washington.

Afhayeenka ayaa sheegay in dilka labadaas marxuum ay ka dambeeyeen waxa uu ugu yeeray kooxaha argagaxiso ah oo doonaya in la caburiya hanaanka saxaafadda xorta ah ee ka hana qaaday dalka Soomaaliya

Ururada u dooda xaquuqda aadanaha oo cambaareeyay dilalkii loo gaystay agaasimihii warbaahinta Hornafrik Cali Iimaan Sharmaa’arke iyo madaxii Idaacada Kapital Voice Mahad Axmed Climi.

Mogadishu,14, August 2007 (HornAfrik Media)

Qaar ka mid ah ururada u dooda xaquuqda aadanaha kuwa ganacsatada ururada haweenka ee fadhigoodu yahay Magaalada Muqdisho ayaa sheegay in dilkii loo gaystay agaasimihii warbaahinta Hornafrik Cali Iimaan Sharmaa’arke iyo madaxii Idaacada Kapital Voice Mahad Axmed Climi yahay mid la doonayo in lagu caburiyo saxaafada xorta ah.

Gudoomiyaha ganacsatada wabi shabeele Caasho cismaan Ugaas shaacuur oo ka mid ah dadka sida wayn ugu tixan Idaacada Hornafrik islamarkaana wada shaqayn ay kala dhaxaysay alle ha u naxariistee Cali Imaan sharmaar’arke ayaa sheegtay in dilkaasi uu ku yeeshay saamayn wayn shacabka reer Muqdisho iyadoo sidoo kale tilmaamtay mid laga xumaado.

Madaxa Hay’adda xaquuqda aadanaha ee elman sudaan Cali axmed ayaa waxaa uu sheegay in falkaasi uu yahay mid wa xuushnimo ah islamarkaana ka fog bini’aadanimada.

Tani waa mid la doonayo in lagu aamusiyo codka dheer ee umada soomaaliyeed loogu kala turjumayo waana caburin lagu hayo saxaafadda soomaaliyeed ayuu yiri madaxa Hay’adda ilman sudaan Cali Axmed.

Madiina Maxamuud cilmi oo katirsan Mas’uuliyiinta ururka Hinna ayaa sheegtay inaysan wanaagsanayn dilalka lala beegsanayo dadka shacabka ah gaar ahaan kuwa dadka wax tarka u leh.

Waxaa ay ahaayeen Cali Imaan iyo Mahad Axmed niman aad iyo aad bulshada soomaaliyeed Magac ugu leh islamarkaana qaran ah oo aan qabiil ahayn ayay tiri Madiina.

C/laahi Calas Jimcaalle oo ah madaxa Hay’adda xaquuqul isnaaka ee Dr Cusmaan Ciil jimcaale oo isna ka hadlayey arrimahaan lagu u gaarsano shacabka iyo saxaafaddad ayaa waxaa uu sheegay in ay tahay arrintaan lagu ka cay Mas’uuliyiintii idaacada Hornafrik iyo capital mid fool xun islamarkaana baaris xoogan lagu samayn doono.

Falalkaan guracan ee lagu dilayo dadka aan waxba galabsan ayaa waxaa iminka si wayn u cambaaraynaya hay’addaha u dooda xaquuqul isnaanka iyo waliba bulshada kale ee soomaaliyeed.