Xoogaga maxkamadaha oo saacado kooban la wareegay xarunta gobolka sh/dhaxe.      

(Mogadishu, Wednesday  ,26  March 2008,(Hornafrik Media)

Ciidamo ka amar qaata Midowga maxaakiimta islaamka oo gaadiidka dagaalka ku hubeysan ayaa saaka la wareegay gacan ku haynta degmada Jowhar iyo degmada Mahadaay ee gobolkaasi sh/dhexe.

Sida uu ku soo waramayo wariyaha idaacada Hornafrik ee maagalada Jowhar Maxamed Abuukar Caseyr waxa saaka halkaasi ka dhacay dagaal aa du qaraar oo u dhaxeeyay ciidamada maamulka dowladda kmg ah ee Somalia iyo xoogaga hubeysan ee ka soo horjeeda.

Dagaalkaan xoogiisu waxa uu ka dhacay gudaha magaalada jowhar saaka waxana waxa ku geeriyooday 8 ruux oo u badan ciidamadii maamulka gobolka iyo dad rayid ah.

lama oga khasaaraha rasmiyan kala gaaray dhinacyada dagaalamay iyadoo la sheegayo in dadka rayidka ah ee dagaalkaasi ku dhintay ay ka mid tahay hooyo iyo labo carruur ah oo ay dhashay.

Maxamed Cumar Deelle oo ah guddoomiyaha gobolka sh/dhexe iyo ku xigeenkiisii Axmed Cumar Jaandhaay ayaa la sheegay inay ku suganyihiin deegaano ka mid ah degmadaasi Mahadaay.

Lama oga halka ay jaan iyo cirib dhigeen Ciidamada maamulka gobolka iyadoo la sheegay in biliqo baahsan ay saaka ka dhacday degmada Jowhar markii ay isaga baxeen xoogaga maxkamaduhu iyadoo sidoo kale la gubay dhamaan goobihii ay ku shaqeyn jireen maamulka gobolkaasi. 

Wararkii ugu dambeeyay ayaa sheegaya in xoogaga maxaakiimta islaamiga ay halkaasi isaga baxeen iyagoona sidoo kale ka baxay degmada mahadaay sida uu sheegtay Madaxa howlgalada maxaakiimta u qaabilsan C/rixiin Ciise Cadow.

Sidoo kale Madaxa Ciidamada Maxaakiimta Islaamiga C/raxiin Ciise Cadoow ayaa intaa Raaciyay in ay la wareegeen Gawaari Dagaal gaareeysay labo oo mid ka mida uu ahaa qoryaha Lidka diyaaradaha ee loo yaqaan Zuuga iyo Rasaas Fara badan oo ay lahaayeen Maamulka Gobolka.

Xoogaga maxaakiimta islaamiga ayaa u muuqda kuwa kusii xoogaysanaya gobolka sh/dhaxe iyadoo maamlihiui ugu dambeeyay halkaasi ay ka jireen cabsi laga qabo inay soo weeraraan magaalooyin badan oo gobolkaasi ka mid ah laakin waa markii ugu horeysay oo ay si xoog ah ula wareegaan maxkamaduhu degmada Jowhar ee xarunta gobolka sh/dhexe.

Maxamed Abuukar Caseyr" Jowhar.