Madaxweyne Daahir Riyaale Kaahin oo soo saaray xeerka uu ku cayimay xiliga ay dhaceyso doorashada.

(Muqdisho,khamiis,24,Julaay,2008,(Hornafrik Media)

Madaxweynaha maamulka la magacbaxay Somaliland Daahir Rayaale Kaahin ayaa soo saaray xeer uu ku cayimayo maalinta ay si rasmi ah u bilaabaneyso diwaan galinta cod bixiyaasha Doorashooyinka Somaliland.

Sida lagu xusay warsaxaafadeed uu shalay soo saaray afhayeenka Madaxtooyada,waxa uu Madaxweyne Daahir Rayaale Kaahin,uu shaaca ka qaaday xiliga ay bilaabaneyso diwaangalinta cod bixiyaasha doorashooyinka Somaliland.

Xilligaas waxa la sheegay inay tahay 4/10/2008 ee sanadkan aanu ku jirno.

Madaxweyne Rayaale ayaa soo saaray xeerkan marka uu arkay qodobka 99-aad ee dastuurka Somaliland iyo markii uu arkey qodobka 14-aad firqadiisa 1-aad ee xeerka doorashooyinka golayaasha deegaanada iyo Madaxtooyada iyo waliba qodobo kale oo u dagsan dastuurkaasi.

Guddiga doorashooyinka Somaliland iyo sadexda Xisbi ayaa horey isla ogolaaday jadwalka qorshe howleedka diiwaan galinta iyo doorashooyinka.