Sargaal Ka tirsan Q.M oo La Afduubay

(Mogadishu, Sunday ,22,June, 2008,(Hornafrik Media)

Madaxa Hay'dda UNHCR ee Magaalada Muqdisho Xasan Maxamed Cali ayaa dabley hubeysan oo aan la garanaynin waxa ay xalay ka afduubteen deegaanka Ceelasha Biyaha ee duleedka Magaalada Muqdisho,iyadoo arrintaani ay cambaareeyeen Laamaha Qaramada Midoobay.

Sargaalkan oo ugu sareeyay Hay’adda qaxootiga aduunka Qaramada Midoobay UNHCR xaafiiskeeda Muqdisho ayaan la ogeyn halka ay la aadeen dableyda afduubtay,balse waxa ay wararku sheegayaan in dhanka Magaalada Muqdisho lala soo aaday.

Hoygiisa oo kuyaala ceelasha Biyaha ayay dableydaasi u daateen waxayna wateen sida la sheegay gaari yar.

Taliye ku xigeenka ciidamada Booliska gobolka shabeelaha Hoose Nuuriye Cali Faarax ayaa sheegay in sargaalkaasi lala aaday dhanka Muqdisho,inkastoo aan wararkaasi la xaqiijin.

Qaramada Midoobay ayaa si aad ah u dhaleeceysay afduubka loo gaystay Mas’uulkan ka tirsan UNHCR,waxana uu noqonayaa Mas’uul sagaalaad oo u shaqeynayay Hay’addaha samafalka oo gudaha soomaaliya lagu afduubto,waxana dadkaasi afduubka loo haysto ka mid ah ajaanib.

Si kastaba ha ahaatee arrintaan ayaa saameyn ku sii yeelanaysa kumanaan qoys oo ka barakacay Magaalada Muqdisho,kuwaas oo haatanba kusugan qeybo badan oo ka mid ah gobolada koofureed ee dalka Soomaaliya.

Kooxaha ka soo horjeeda siyaasada dowladda kmg ah ee soomaaliya ayaa iyagu horey u sheegay inaysan wax dhibaato ah u gaysan doonin saraakiisha samafalka ee ka howlgala dalka soomaaliya,balse macada gacanta sadexaad ee afduubkani ka wada dalka.