Weriye Nasteex Daahir oo maanta lagu aasay Kismaayo.

(Mogadishu, Sunday ,8,June, 2008,(Hornafrik Media)

Allaha u naxariistee Nasteex Daahir Faarax ayaa goor dhoweyd lagu aasay qabuuraha Baarcaleen ee duleedka magaalada Kismaayo, ka dib markii xalay kooxo hubeysan ay toogasho ugu geysteen bartamaha magaaladaasi xili uu ku sii jeeday gurigiisa. 

Nasteex ayaa xalay meydkiisu ku baryay isbitaalka weyn ee Kismaayo halkaasi oo maanta ay ka soo galbiyeen meydkiisa boqolaal dad ah oo isugu jira salaadiin, waxgarad, culamaa’udii, haween, caruur iyo iyo xubno maamul oo ka tirsan mas’uuliyiinta gobolkaasi J/hoose.  

Dilka ayaa la sheegay in ay geysteen kooxo dabley ahaa oo ku hubeysnaa hub gacmeedka loo yaqaano Bastooladaha kuwaasi oo rasaas la beegsaday weriye Nasteex Daahir. 

Nasteex Daahir ayaa dhaawaciisa durbaba loola deg degay isbitaalka weyn ee magaalada halkaasi oo daqiiqado yar ka gadaal uu ku geeriyooday. 

Ilaa iyo iminka ma cadda sababaha rasmiyan ka dambeeya dilkaasi foosha xun ee lagu qaarajiyay Nasteex.   

Sida wararku sheegayaan nin dableey ah ayaa ku dhuftay weriye Nasteex Daahir saddex xabadood, wuxuuna ku geeriyooday isbitalka Kismaayo oo loola cararay markii rasaasta lagu dhuftay.

Mas'uuliyiinta Soomaalida iyo diblomaasiyiinta ka qeybgalaysa shirka dib u heshiisiinta ee ka soconaya waddanka Djibouti ayaa tacsi u diray qoyskii iyo hey'adda BBC-da ee u shaqeynayay weriya Nasteex Daahir.

                                                                                                                  Wariye Nasteex waxa dilay Nin dabley ah.

Ra'iisul Wasaaraha dowladda KMG ah Nuur Xasan Xuseen iyo Wasiirka warfaafinta Axmed Cabdisalaam Aadan ayaa walaac ka muujiyay inay weli socoto ugaarsiga weriyeyaasha Somalia ee hawsha muhiimka ah haya.

Guddoomiyaha Isbahaysiga Dib u xoreynta Shiikh Shariif Shiikh Axmed ayaa isna tacsi u diray, isagoo ka digay dilka dadka shacabka ah.