Qaramada midoobay oo warqad tacsi ah u dirtay shirka warbaahinta HornAfrik iyo Capital Voice.

Mogadishu ,24, August 2007 (HornAfrik Media)Qaramada Midoobay ayaa cambaareysay falkii lagu dilay Mas'uuliyiintii warbaahinta Hornafrik iyo capital Voice Cali Iiman iyo Mahad Axmed.

Madaxa isku duwaha bini’aadanimada qaramada u qaabilsan soomaaliya Eric Laroche ayaa waxaa uu Tacsi tiiraanyo leh u diray dhamaan eheladii iyo asaxaabtii ay ka geeriyoodeen Mas'uuliyiintii warbaahinta shirkada HornAfrik Cali Iiman sharmaar’arke iyo Mahad Axmed Cilmi isagoo sheegay in si aad ah uu uga naxay geeridii deg dega ahayd ee ku timid labadaasi marxuum oo si kas ah loogu qaarajiyay 11 bishaan Magaalada Muqdisho.

",Waxaa si qota dheer naxdin noogu noqotay markii aan maqalnay geeridii naxdinta lahayd ee soo gaartay Cali Imaan iyo Mahad Axmed waana arrin murugo badan nagu reebtay", ayuu yiri Eric Laroche.

Waxaa uu sheegay in qaramada Midoobay ay si aad ah u xushmayso warbaahinada Capital Voice iyo waliba shirkadda wayn ee HornAfrik waxaana uu intaasi raaciyay in Mas’uuliyiinta la dilay ay haayeen kuwa si wayn wax tar ugu leh bulshada caalamka iyo waliba dalka soomaaliya.

",Waxaan aad ugu farxaysanahay sida wanaagsan ee xoriyadda leh oo ay labadaasi Marxuumiin dadka wararka ugu gudbin jireen islamarkaana ay u deeqsiin jireen", ayuu sii raaciyay hadalkiisa Eric Laroche.

Waxaa ugu dambayn uu ku soo gaban gabeeyay Eric Laroche.hadalkiisa in geerida labadaan Mas’uul ay qasaare wayn u tahay warbaahinta Soomaaliyeed iyo qaramada Midoobay.

Alle ha u naxariistee wariye Mahad Axmed Cilmi ayaa waxaa ay kooxo hubeysan ku dileen 11 bishaan meel u dhaw irida shirkada HornAfrik, iyadoo alle ha u naxariistee Cali Iimaan lagu dilay Bam isaga oo ka soo laabtay aaska saaxiibkiis Mahad Axmed.

Waxaa dilalkaasi cambaareeyay dowladda Maraykanka ,Midowga Yurub,Canada, iyo waliba qaramada Midoobay waxaa sidoo kale dilalkaasi si wayn u cambaareeyay dowlada fadaraalka soomaaliya ,golaha maxkamadaha islaamiga soomaaliyeed oo fadhigoodu yahay dalka ereteria iyo bulshada rayidka soomaaliyeed.