Inta la ogyahay 2 ka tirsanaa ciidamada dowladda kmg ah ee Somalia ayaa ku geeriyootay tiro kale oo dad ahna waa ay ku dhaawacmeen dagaal qaraar oo ka dhacay qeybo ka mid ah Magaalada Muqdisho.

Dagaalkaan ayaa ka qarxay saaka kadib markii kooxo hubeysani weerar ku qaadeen ciidamada dowladda ee fariisinka ku lahaa saldhiga degmada Hodan iyo qeybo ka mid ah degmadaasi.

Dad goobjooyaal ah ayaa u HornAfrik sheegay in labo ka mid ah ciidamada dowladda la dilay iyadoo khasaare la sheegay inuu soo gaaray kooxaha weerar ka qaaday inkastoo aan la sheegin inta uu la egyahay.

Dagalkaan ayaa xoogiisu ka dhacayay ilaa saaka agagaarka Tarabuunka, saldhiga Hodan iyo xaafada Afrikaan Village oo ka wada tirsan degmada Hodan waxana xiisadu hada ay tahay mid kacsan.

Ilaa iminka si dhab ah looma xaqiijin karo khasaaraha rasmiyan kala gaaray labada dhinac iyo dadka rayidka ah ee lagu kor dagaalamay.

Wixii koo kordha kala soco wararkeena dambe.